මව්කිරිත් විස කරන HIV

තරුණ විසයට නොබලා දුර දිග
වියරු සිත් වලින් කරනා දඟ වැඩ
නොසිතූ විලසට කැඳවා විපාක 
ජීවිත අහසට උදා කර අමාවක

හිතේ සැකයක් ඇතිනම් කකියන
ප්‍රමාද හොඳ නෑ වනසයි ජීවිත 
හනික පිරික්සන තරමට නොවී පසුබට 
ගෙන දෙයි නුඹ හට තවත් ආයුෂ

අනුජිතා කහදුව

HIV හෙවත් මානව ප්‍රතිශක්ති ඌනතා වෛරසය ශරීරගතවී ප්‍රතිශක්තිකරණ පද්ධතිය දුර්වල කර AIDS හෙවත් නතූ කරගත් ප්‍රතිශක්ති ඌනතා සහලක්ෂණය ඇති වේ. මෙය HIV මඟින් ඇතිවන විශේෂ පිළිකා ඇතිවන තත්වයක් ලෙස ද හැඳින්විය හැකි ය. HIV ආසාදිත පුද්ගලයෙකුගේ රුධිරයේ, ශුක්‍ර තරලයේ, යෝනි ශ්‍රාවයේ හා මව්කිරිවල HIV වෛරසය අඩංගු වේ. HIV ආසාදිත පුද්ගලයෙකු හා පවත්වන යෝනි හෝ ගුද අනාරක්ෂිත සබඳතා මඟින් මෙම වෛරසය බෝ විය හැකි ය. තව ද ජීවාණුහරණය නොකළ ඉඳිකටු හා සිරිංජර මඟින්, වෛරසය අඩංගු රුධිරය ශරීරගතවීම මඟින් මෙන්ම ආසාදිත මවකගේ දරුවෙකුට ගර්භනි අවස්ථාවේදී, ප්‍රසූතියේදී හෝ මව්කිරි ලබා දීමේදී ද මෙම වෛරසය බෝ විය හැකි ය. ආරක්ෂාකාරී හා වගකිව යුතු ලිංගික සබඳතා පැවැත්වීම මඟින් HIV ආසාදිතයෙකු වීම වළක්වා ගත හැකි ය. 

HIV සමඟ ජීවත් වන අය සඳහා ඇති ආයතන ලෙස LANKA PLUS, POSITIVE WOMEN NETWORK හා POSITIVE HOPES ALLIANCE ආයතන හැඳින්විය හැකි අතර HIV සමඟ ජීවත්වන අය සඳහා උපකාර කරන ආයතන ලෙස FAMILY PLANNING ASSOCIATION OF SRI LANKA, NEST, AIDS FOUNDATION LANKA හා  SALVATION ARMY හැඳින්විය හැකි ය. 

තරුණයන් වන අපි, ජීවිතයේදී වඩාත් වගකීම් සහගතව කටයුතු කර අපගේත් අන් අයගේත් ජීවිත විනාශ වී යාමට නොදී රැක ගැනීමට වගබලා ගත යුතු වෙමු. මේ වන විට ද ඔබ HIV ආසාදිතයෙකු දැයි ඔබට සැක සහිත නම්, එය වසන් කිරීම ඔබට මරණය ළඟා කරවීමට තරම් ප්‍රබල විය හැකි ය. පරික්ෂාවකින් හැර කිසිදු ආකාරයකින් HIV තත්වය හඳුනාගත නොහැකි අතර රෝග ලක්ෂණ පහළ වන තුරු සිටියොත් ඔබගේ ප්‍රතිශක්තිකරණ පද්ධතියට දැඩි ලෙස හානි සිදුවිය හැකි ය. HIV පරීක්ෂාවේ ප්‍රතිඵල ඔබ හැර අන් කිසිවෙකුට දැනුම් නොදී එහි රහස්‍යභාවය සෑමවිටම ආරක්ෂා කිරීමට ඒ අදාළ අංශ කටයුතු කරන බව අපි සතුටින් දැනුම් දෙමු. බුද්ධිමත්ව කටයුතු කර ඔබගේත් අන් අයගේත් ජීවිත ආරක්ෂා කිරීමට යොවුන් හද අඹරට කරන ආයාචනයයි මේ…

Reference:

https://www.aidscontrol.gov.lk/images/pdfs/publications/NSACP_Annual-Report_2019.pdf